ᲔᲜᲘᲡ ᲐᲠᲩᲔᲕᲐ
როდესაც გაუშვებთ Tor-ბრაუზერს, ენად მითითებული ექნება სისტემის ნაგულისხმევი ენა.
Tor-ბრაუზერი ხელმისაწვდომია მრავალ ენაზე და შეგიძლიათ მიუთითოთ სასურველი მათგანი „ენის შეცვლაზე“ დაწკაპებით.
„ენის“ პარამეტრებში აირჩიეთ სასურველი ენა ჩამოსაშლელი მენიუდან.
დაკავშირება
Tor-ბრაუზერის გაშვებისას იხილავთ Tor-თან დაკავშირების ფანჯარას.
იგი გთავაზობთ აირჩიოთ, პირდაპირ დაუკავშირდეთ Tor-ქსელს, თუ გამართოთ Tor-ბრაუზერი თქვენი კავშირებისთვის.
ჩაურთეთ „ყოველთვის თვითდაკავშირება“, რომ Tor-ბრაუზერი თავადვე დაუკავშირდეს ხოლმე Tor-ქსელს წინათ დამახსოვრებული პარამეტრებით ყოველ ჯერზე გახსნისას.
უმეტეს შემთხვევაში „დაკავშირებაზე“ დაჭერა საკმარისია Tor-ქსელთან მისაერთებლად დამატებითი გამართვის გარეშე.
როდესაც დააწკაპებთ, გამოჩნდება მდგომარეობის ზოლი, სადაც ნაჩვენები იქნება Tor-თან კავშირის მიმდინარეობა.
თუ შედარებით სწრაფი ინტერნეტი გაქვთ და ზოლის შევსება გაიჭედება ერთ წერტილში, დაიხმარეთ „კავშირის მეგზური“ ან იხილეთ გაუმართაობის აღმოფხვრის გვერდი ხარვეზის გამოსასწორებლად.
თუ იცით, რომ თქვენი კავშირი ცენზურის ქვეშაა ან პროქსის იყენებს, მაშინ უმჯობესია დაწკაპოთ „კავშირის გამართვა“.
კავშირის მეგზური
თუ Tor იზღუდება თქვენს ადგილსამყოფელზე, ხიდი გამოგადგებათ. კავშირის მეგზური აგირჩევთ მდებარეობის მიხედვით.
თუ კავშირის მეგზური ვერ დაადგენს თქვენს ადგილსამყოფელს, აირჩიეთ მხარე ჩამოსაშლელი მენიუდან და დაწკაპეთ „ხიდის მოსინჯვა“.
გამართვა
Tor-ბრაუზერი გაგიძღვებათ გარკვეული სახის პარამეტრების გასამართად.
კავშირის მეგზური გაცნობებთ ინტერნეტთან და Tor-ქსელთან შეერთების მდგრადობის შესახებ.
პირველი ჩასართავია „ყოველთვის თვითდაკავშირება“.
როცა აყენია ჩართულზე, ყოველი გახსნისას Tor-ბრაუზერი თავადვე შეეცდება დაკავშირებას ქსელის უკვე მითითებული და დამახსოვრებული პარამეტრებით.
თუ იცით, რომ ცენზურის ქვეშ იმყოფებით ან სცადეთ დაკავშირება Tor-ქსელთან და ვერ მოხერხდა, ამასთან ვერც სხვა გადაწყვეტებმა უშველა, შეგიძლიათ სცადოთ მისაერთებელი გადამყვანების გამართვა Tor-ბრაუზერში.
„ხიდებთან“ გამოჩნდება გვერდის ავლის არე, საიდანაც შეძლებთ გამართოთ მისაერთებელი გადამყვანები ან დაუკავშირდეთ ხიდებით.
სხვა პარამეტრები
თუ თქვენი კავშირი პროქსის იყენებს, მის გასამართად გახსენით „პარამეტრები...“ და შემდეგ „მიუთითეთ, თუ როგორ დაუკავშირდეს Tor-ბრაუზერი ინტერნეტს“.
ჩვეულებრივ, არაა საჭირო რამის შეცვლა. წესით, ისედაც გეცოდინებათ, თუ რომელიმე უჯრის მონიშვნაა საჭირო, რადგან იმავე პარამეტრების მითითება, სხვა ბრაუზერებზეც დაგჭირდებოდათ.
თუ შესაძლებელია, გაესაუბრეთ თქვენი ქსელის ზედამხედველს, დამატებითი მითითებებისთვის.
თუ თქვენი ქსელი არ იყენებს პროქსის, დაწკაპეთ „დაკავშირება“.
